Kathopanishad (Malayalam)

പ്രശ്‌നങ്ങൾക്ക് അന്തിമപരിഹാരം കാണുന്നതുവരെ മനുഷ്യൻ അസ്വസ്ഥനാണ്. അസ്വസ്ഥനാക്കുന്ന കാരണങ്ങളെ അന്വേഷിച്ച് ആധുനികമനുഷ്യൻ അവനിൽനിന്നു വെളിയിലേയ്ക്കാണ് പോകുന്നത്. പ്രശ്‌നകാരണമന്വേഷിച്ച് ഈ ലോകത്തിലും, സ്വർഗ്ഗലോകത്തിലും അലഞ്ഞു നടന്നിട്ടു പ്രയോജനമില്ലെന്നും, തന്നിലേയ്ക്കുതന്നെ തിരിഞ്ഞു മനുഷ്യന്റെ യഥാർത്ഥസത്തയെക്കുറിച്ചു ബോധവാനാകുകയാണ് പ്രശ്‌നപരിഹാരമെന്നും സ്വാനുഭവത്തിലൂടെ തെളിയിച്ച ഒരു സാധകന്റെ കഥയാണ് അത്യന്തസുന്ദരമായി, കാവ്യഭംഗിയോടുകൂടി ഈ കഠോപനിഷത്തിൽ വിസ്തരിക്കുന്നത്. അസ്വസ്ഥത അനുഭവപ്പെടുന്നവർ ഈ ഉപാഖ്യാനം ശ്രദ്ധയോടെ പഠിച്ച് ആചരിച്ചുനോക്കട്ടെ. അപ്പോൾ കാണാം അസ്വസ്ഥത ഓടിമറയുന്നത്, തത്സ്ഥാനത്തു ശാന്തി, പരമശാന്തി, വിളയാടുന്നത്.